Док-муабети под смоквата
Денот стивнува, а ако за миг се стивне и умот, па го поведе и телото, ќе слушнете што вели оџата пеејќи на јазик, за многумина од нас неразбирлив. Што вели? Да забавиме, да оставиме, да го олесниме чекорот што лепи по скопската калдрма низ чаршијата, додека итаме кон анот за да ја прелажеме горештината среде август. Одеднаш, олеснување. Зад тешките камени ѕидини нѐ прегрнува ладовина, мислата се избиструва, тече вода во центарот… Добро е. Се слуша детско кикотење и понекој заскитан кучешки лаеж. Часот е неколку минути пред 18. Значи, рано е за проекција, сѐ уште е ден, но време е за муабет, да поприкажеме и да се чуеме…
Седнати во круг, за миг замолчуваме, тука сме сите и може да почнеме. Во воздухот се шири летен повеј на турски чај, дива смоква и лубеница. Лажичката замешува, ја топи коцката шеќер, ѕвекотот го означува почетокот на дискусијата. Зборуваме за ликови кои живеат осаменички среде планини, ледени пустини и океани, па за некои други кои живеат среќни среде несреќа, па на ред доаѓаат новите форми на комуникација и технологија, па лудоста да снимаш кога сите ти велат дека не треба, па некој ги кажува маките кога снименото се изгубило, па друг зборува за радоста кога на филмското платно видел дека сето бесмислено имало смисла…
Сонувачи и сонувачки, и оваа година ќе муабетиме под сенката на нашата смоква.
Да живееме и да раскажуваме!
Локација: Куршумли ан
Датум: 20.08-26.08.2021
Време: 18:00 – 20:00
20.08. Што сега?
Мигел Ек, Никола Илиќ, Корина Швингрубер Илиќ
21.08. Уживајте на украински начин
Викториа Лешченко, Јулиа Коваленко, Гана Јарошевич, Оксана Карпович, Алина Горлова, Зоја Лактионова.
22.08. Зошто си требаме
Doc Around Europe Network
Адел Кохо (Dok.fest Munchen), Кристин Камдесус (FIPADOC), Петра Селишкар и Дарко Набаков (MakeDox)
25.08. Балкански филм – иднината е сега
Метју Сомервил, Марија Зидар, Тања Балач, Кирил Шентевски, Виктор Еде
26.08. Молк во жири комисијата
Адел, Кохо, Питер Зак, Ивана Тодоровиќ, Микеле Сини, Танкред Ривер, Кристина Горовска