„Помалку значи повеќе“: Мастерклас со Џон Апел

„Помалку значи повеќе“ е мотото според кое се води Џон Апел уште од завршувањето на студиите по филм. Па не е за чудење што токму така гласи и насловот на неговиот мастерклас!

Ќе зборува за уметноста на раскажувањето приказни, за справувањето со најразлични ограничувања, пречки и грешки во правењето документарен филм. И за тоа како сето ова да се сврти во своја корист. Ќе зборува и за моќта на ограничувањето, но и за уметноста на тишината – за креирањето тишина во интервјуа, за тишината како алатка за раскажување приказна. И сето ова, се разбира, поткрепено со кадри од неговите и од филмовите на други филмаџии.

Џон Апел – Биографија

„Моите филмови ги градам врз основа на темелно истражување и интуиција. Дури истражувам, не барам само факти, туку ја барам и ранливоста на луѓето, тоа е т.н. емотивно истражување“, вели режисерот и снимател Џон Апел кој зад себе има над 40 документарни остварувања за кино и телевизија.

Во 1987 година дипломира на Холандската филмска академија со документарецот за локалната пиратска радиостаница „Радио Даниел“, кој ќе биде прогласен за најдобар студентски филм.

Во 1993 година го режира својот прв документарен филм „Џони Меер – тело и душа“. Во 1999 година неговиот „Андре Хазес – таа верува во мене“ не само што го отвора Меѓународниот фестивал на документарни филмови во Амстердам (ИДФА), туку и се закитува со наградата за најдобар долгометражен документарец, по што станува најгледаниот документарен филм во Холандија во последните шеесетина години.

Неговата филмографија брои низа наградувани филмови: „Последната победа“ (2003), „Коцкар“ (2009), „Погрешно време, погрешно место“ (2012), „Гласот на Холанд“ (2018) и „Кога прашината ќе слегне“ (2019). Сите овие се приказни за обични луѓе и осамени херои, за меланхолијата, спомените, смртта и утехата  што го бојат секојдневниот живот.

Работи како ментор на филмски работници од Средниот Исток во рамки на Меѓународната програма за обука „Клоуз ап“ и е визитинг- професор на Универзитетот „Бабеш Болјаи“ во Клуж, Романија.

22.08. | 11:00 – 13:00 CEST (GMT +2) | Zoom

Пријавете се преку пополнување на формуларот.