Работилницата ќе се одржи од 15 до 19 август 2024 година во Скопје, за време на 15. издание на „МакеДокс“.

Работилницата ќе спои 4 внимателно избрани режисер(к)и или тимови (режисер(к)и и монтажер(к)и). Во фокус е идентификувањето различни стратегии и можности за визуелно конципирање на архивите, со што се проширува креативниот опсег при снимањето на филм. Преку ова интензивно заедничко искуство се надеваме дека ќе ги охрабриме учесниците да се приближат до суштината на секој филмски проект, дискутирајќи за различните потенцијални пристапи за секој филм во кој се користат архивски материјали.

Кумјана Новакова

Кумјана Новакова е режисерка чиешто авторство се базира врз истражување, а работи и како филмска кураторка и предавачка.

Родена во Југославија, Кумјана работи на полето на филмот и уметноста од 2006 година. Нејзиното формално образование комбинира меѓународни односи и студии за културни и социјални истражувања во Софија, Сараево, Болоња и Амстердам.

Како авторка, Кумјана ги истражува јазиците на кинематографијата поврзани со односите меѓу моќта, војната, сеќавањата и (не)припаѓањето. Ја интересира развивањето стратегии за тоа како може да се креираат значења од позиција на некој што се занимава со филм, и потенцијалот на тие значења како територија на нови колективи. Нејзината работа е прикажувана и изложена низ целиот свет.

Нејзиниот филм „Вознемирена земја“ (ко-режиран со Г. К. Канди) беше во тесен избор за наградата „Оскар“. Нејзиниот најнов филм „Молкот на разумот“, кој е моментално во дистрибуција, досега бил прикажан во њујоршкиот МоМА, најголемиот Меѓународен фестивал на документарен филм во Амстердам (IDFA), на фестивалите HotDocs и Cinema du Reel и доби бројни награди, вклучувајќи ги и: наградата за најдобра режија на IDFA во 2023 година, во селекцијата Envision, Гран-при на шпанскиот Punto de Vista, најдобар интернационален филм на парискиот Cinema du Reel, „Срцето на Сараево“ за човекови права во документарен филм итн.

Кумјана е вонредна професорка на катедрата за нефикција на Вишата школа за аудиовизуелни уметности во Барселона (ESCAC), Фабриката за филм на Бела Тар во Сараево и на магистерските студии за филм на Холандската филмска академија во Амстердам.

Моментално живее на релација Сараево – Скопје.