Аугусто Гонгора, пензиониран чилеански новинар кој пишувал за злосторствата на режимот на Пиноче и Паулина Урутија, актерка, активистка и политичарка, повеќе од 20 години се вљубен пар. Пред 8 години, на Аугусто му е дијагностициран Алцхајмер и сега двајцата се соочуваат со неизбежниот пад на неговите физички и ментални способности. Топлата, бескомпромисна посветеност на Паулина и жестоката борба на Аугусто да го зачува својот идентитет се главните теми на оваа приказна која е длабоко трогателно и инспиративно сведоштво за нивната љубов. Филмот го истражува човечкото достоинство во старост и мака, како и механизмите на индивидуално и колективно сеќавање. На што – и на кого – се сеќаваме од нашето минато? Зошто забораваме или потиснуваме одредени спомени и какви последици има тоа врз поединецот и врз цела една земја?