Мото: „Кому му е гајле за реалноста?“

МакеДокс објавува отворен повик за визуелен идентитет и дизајн на постер за 16-то издание на фестивалот на креативен документарен филм МакеДокс, кое ќе се одржи од 21 до 28 август 2025 година во Скопје.

Оваа година прашуваме:
Кому му е гајле за реалноста?

Во свет каде вистината се менува побрзо од нашата способност да ја сфатиме, и каде сликите ја заматуваат границата меѓу факт и фикција, потребата да гледаме внимателно, креативно, критички и со грижа, никогаш не била поголема.

Ова издание продолжува да го истражува патувањето низ слоевите на кромидот – заштитниот симбол на МакеДокс. Ги покануваме дизајнерите, илустраторите и визуелните мислители да ни помогнат да ја преточиме оваа рефлексија во моќен дизајн на постер, кој ќе биде основа на визуелниот идентитет на МакеДокс 2025.

Вашата работа треба да задржи визуелна поврзаност со досегашното наследство на фестивалот, продолжувајќи го препознатливиот дух на МакеДокс, а воедно да понуди свежина и храброст како одговор на овогодинешната тема.

Аплицирајте со:

• Два визуелни предлози за постерот (во JPG или PDF формат)
• Краток концепт-текст (до 300 зборови) со објаснување на вашата идеја и пристап
• Кратка биографија и портфолио

Забелешка: постои можност избраните предлози да се доразвијат во соработка со тимот на МакеДокс.

Кој може да аплицира:

• Индивидуалци или тимови
• Без географски ограничувања

Рок за пријавување: 15 јуни 2025, до 23:59 часот (CEST)

Аплицирајте преку пополнување на ФОРМУЛАРОТ.

Избраниот/та дизајнер/ка ќе биде ангажиран/а за финализирање на фестивалскиот постер, вклучително и адаптации за социјални медиуми и изработка на пет двострани страници за фестивалскиот каталог.
Овие материјали не се бараат во фазата на апликација, но ќе бидат дел од финалниот процес на дизајн.

Авторот/ката на избраниот предлог ќе добие хонорар за изработка на визуелниот идентитет и ќе биде кредитиран/а во сите промотивни материјали.
Организацијата го задржува правото да не избере ниту еден од поднесените предлози.

Како изгледа реалноста денес, низ твоите очи?