СЕБАСТИЈАН КАЈЗЕР

Себастијан Кајзер е роден во источен Берлин и студирал култура и театар во Берлин, Лајпциг и Москва. Од 2008 до 2017 година бил драматург во Народниот театар во Берлин, каде што курирал и големи политички и уметнички настани како „Конференција Африка – 130 години берлинизација на континентот“. Ги иницирал серијата разговори за иднината на Европа со Славој Жижек, Јанис Варуфакис, Едвард Сноуден, Жулијан Асанж и други. Учествувал и во формирањето на паневропското движење и политичка партија ДиЕМ25. Во 2007 година режира документарец за затворениот воен град Балаклава. Во 2022 година ја основа Мрежата за уметничко разузнавање, со која перформансите и филмовите се продуцираат на границата помеѓу уметноста и теоријата. Во периодот од 2014 до 2019 година предавал на универзитети во Берлин, Лајпциг, Осло и Њујорк. Од 2020 година до денес е гостин предавач на Централната академија за драма во Пекинг и на Универзитетот во Нанкинг.

ДРАГОМИР ЗУПАНЦ

Драгомир Зупанц е роден во 1946 година во Љубљана. Во 1971 година дипломира ТВ и филмска режија на Факултетот за драмски уметности во Белград. Бил уредник на забавно- рекреативната програма на ТВ Црна Гора (1985 – 1990) и главен режисер на Радио- телевизија Србија од 1996 до 2010 година.

Неговото работно искуство опфаќа реализација на бројни телевизиски програми и филмови, документарни филмови, како и многу ДВД и ВХС изданија, меѓу кои се изведувачи како Рамбо Амадеус и Бајага и Инструктори.
Добитник е на низа награди, вклучувајќи ги „Златен медал“ на белградскиот Фестивал на документарен и краток игран филм (2005) и „Златен јавор“ за придонес во кинематографијата на Филмскиот фестивал во Јахорина (2018). Член е на Академијата на филмските науки и уметности и уметнички директор на ревијата „Денови на словенечкиот филм“. Живее и работи во Белград.

ИСКРА ГЕШОСКА

Искра Гешоска е основачка и претседателка на Контрапункт – асоцијација за развој на критичка теорија, социо-културен активизам и современи уметнички практики. Уште од 1994 година е активна во градењето и зародишот на независниот културен сектор и современите самоорганизациски формати на дејствување во социо-културниот простор. Во 2016 година го основа КРИК – Фестивал за критичка култура и е извршна уредничка на програмата. Беше директорка на независниот културен центар „Точка“ од неговото формирање, па сѐ до неговото затворање (2002 – 2010), како и уредничка во издавачката куќа „Темплум“ и во списанието „Маргина“ во периодот од 1998 до 2008 година. До сега има објавено над 100 есеи, стручни трудови во сферата на критичката теорија, изведувачките уметности, визуелните уметности и културните политики. Во периодот од 2019 до 2024 беше надворешна соработничка и советничка за прашања од областа на културата на тогашниот претседател на Република Северна Македонија, Стево Пендаровски.