ЖИРИ ЗА НАГРАДАТА „КРОМИД“

Ненад Пуховски е филмски режисер, продуцент и директор на „Загребдокс“, најголемиот фестивал на документарни филмови во регионот, кој го основа во 2005 година.

Студиите по филозофија и драмска уметност ги завршува во Загреб, по што почнува да режира за театар, филм и телевизија. Има потпишано над 250 продукции како режисер, а како продуцент и основач на „Фактум“, најзначајната хрватска независна документарна продукција, зад себе има 70 документарни филмови, кои се многукратно наградувани, но и жестоко оспорувани.

Работи како редовен професор по документарна режија на Академијата за драмски уметности, а ги води и единствените магистерски студии за документаристика во Југоисточна Европа.

Неговите заложби за развојот на современиот хрватски документарен филм се многупати наградувани, како во 2009 година кога ги добива наградата на Европската мрежа на документарен филм (ЕДН) и Медалот на Градот Загреб.

Член е на Европската филмска академија.

Лари Сајдер е филмски монтажер и дизајнер на звук кој има долги години искуство во документарци, анимација и фикција. Во моментов е на чело на постдипломските студии по звук, постпродукција и дизајн на Универзитетот Голдсмит во Лондон, а предава и низ Обединетото Кралство и пошироко. Основач и ко-едитор е на журналот „Новиот саундтрак“, а од 2002 до 2006 година бил и раководител на отсекот за постпродукција на Националната школа за филм и телевизија во Биконсфилд.

Од 1998 година ја промовира улогата на звукот во филмската продукција како директор на 4-дневниот Меѓународен симпозиум „Школа за звук“, каде што се истражува употребата на звукот во сите уметности и медиуми.

Орва Нирабија е уметничкиот директор на Меѓународниот фестивал на документарен филм во Амстердам (ИДФА). Роден е во Сирија каде што работел како глумец и новинар пред да ја основа првата независна продукциска компанија за документарци во земјата, во 2002 година, заедно со својата партнерка. Во 2008 година заедно го основаат и независниот фестивал на документарен филм „Докс бокс“, кој многу бргу ќе стане водечки во регионот. Во 2012 година тој се сели во Египет, па следната година во Германија каде што продолжува да продуцира наградувани меѓународни копродукции, како што се: „Кукли, жена од Дамаск“ (ИДФА, 2007 г.), „Враќање во Хомс“ (ИДФА, 2013 и „Санденс“, 2014 г.) и „Сребрена вода“ (Кански филмски фестивал, 2014 г.).

Им бил тутор на многу нови филмски автори низ целиот свет, а гостувал и во жиријата на некои од светски највлијателните филмски фондови и фестивали. Во списокот на награди што ги имаат освоено неговите филмови се и наградата од Главното жири на „Санденс“ и Грирсоновата награда која се доделува за иновативен и возбудлив документарен филм.