Жири за наградата „МЛАД КРОМИД“

Вардан Тозија

Вардан Тозија е филмски режисер и сценарист. Дипломира на Факултетот за драмски уметности во Скопје. Пред да почне да се занимава со режија, работел како новинар и уредник во домашни весници и списанија. Режирал неколку кратки играни филмови и документарци: „Човекот со чудна навика да ме удира со чадор по глава“, „Свиркачот“, „Еден“, „Дома?“, кои се прикажувани и наградувани на неколку меѓународни филмски фестивали.

За својот дебитантски игран филм „Амок“, кој беше премиерно прикажан на Филмскиот фестивал во Чикаго и селектиран на над 20 престижни филмски фестивали низ светот, има добиено важни критички признанија и бројни награди: „Гран-при“ и ФИПРЕСЦИ. Неговиот втор игран филм „М“ досега патуваше на над 30 фестивали по неговата фестивалска премиера во 2024 година и собра 11 награди: „Гран-при“, награда за најдобар режисер и награди од публиката на некои од најголемите меѓународни и жанровски филмски фестивали.

Во последниве години, работи и како режисер на неколку домашни ТВ- серии.

Трулс Лие

Лие има повеќе од 30 години искуство како уредник на весници и магазини. Тој е уредник на кино-политичкиот документарен магазин Modern Times Review (од 2017 година). Од 2015 година е и уредник на NY TID (современи времиња), норвешко квартално списание во форма на печатена книга, посветено на публицистика и нефикција.

Како документарист, создава есеистички документарни филмови. Во моментов работи на долгометражниот проект Палестина – Пет есеи за слободата. Лие претходно бил издавач и главен уредник на Morgenbladet во Осло (1993 – 2003) и на Le Monde diplomatique (2003 – 2013). Исто така бил и уредник на магазинот DOX на EDN во текот на 4 години.

Мара Прохаска Марковиќ 

Мара Прохаска Марковиќ е историчарка на уметност, кураторка и продуцентка која живее и работи во Белград, Србија. Со над 20 години искуство во јавниот, граѓанскиот и приватниот сектор, таа има долго и опсежно работно искуство во областа на културата и аудиовизуелната индустрија. 

Нејзината експертиза вклучува продукција и кураторство на бројни културни настани, фестивали, изложби, уметнички резиденции и уметнички дела како во Србија, така и на меѓународно ниво. Од 2009 година е дел од организацискиот тим на Меѓународниот фестивал на документарен филм „Белдокс“, a од 2020 година е директорка на фестивалот. Во оваа улога, таа е и кураторка на изложбата „XR: Имерзивна реалност“. 

Членка е на Меѓународната асоцијација на ликовни критичари (AICA), Здружението на ликовни и применети уметности на Србија и Европската асоцијација за документарни филмови, како и алумна на програмата за женско лидерство „Аудиовизуелни жени 2023“ на Институтот „Ерих Помер“.