Работилници

1.Реалноста режира, ние правиме филмови | Работилница со Пирјо Хонкасало

Преку тридневната работилница (17-19 август), организирана со поддршка на канцеларијата Креативна Европа МЕДИА на Македонија, Пирјо Хонкасало нè воведува во светот на пренесувањето на реалноста на платно. Со неа учесниците ќе можат не само да дискутираат, туку и да го видат умешното користење на документарниот јазик во нејзините филмови „Три соби на меланхолијата“, „ИТО“ и „Бетонска ноќ“. Низ дискусии по проекциите учесниците ќе дознаат и како да се одберат темата и протагонистите и до каде досега етичката одговорност на режисерот кон нив.

Биографија

Пирјо Хонкасало е призната и многупати наградувана режисерка и сценаристка на документарни филмови и е првата финска филмаџика која снимила игран филм. Нејзини се наградуваните филмови „Трилогија на светото и ѓаволското (Мистерион, Тањушка и Седумте ѓаволи и Атман)“ и неверојатно прекрасниот „Три соби на меланхолија“. Таа е членка на Американската филмска академија со над 30 ретроспективи низ целиот свет.

2.Режирање реалност | Работилница со Војцех Старон

За време на работилницата на Војцех Старон, која трае од 20 до 22 август, учесниците ќе (на)учат како да разговараат со публиката користејќи подвижни слики и едноставност. Прва тема на дискусија ќе биде умешноста на доловувањето на врските, релациите и емоциите. Старон верува дека платното ги отсликува не само чувствата на протагонистите, туку и на снимателот, па затоа ќе се осврне и на фотографијата во филмот која е само една од потребните состојки за вистинита приказна. Извадоци од неговите филмови „Сибирска лекција“, „Аргентинска лекција“, „Браќа“ и „Дон Жуан“ ќе дадат пример за режирање реалност на полски начин.

Оваа работилница се случува со поддршка на Филмската фондација на Краков.

Биографија

Војцех Старон е полски снимател и режисер на документарни филмови кој студирал на престижната филмска школа во Лоѓ. Неговиот „Аргентинска лекција“ е меѓу најнаградуваните документарци во поново време. Член е на Европската филмска академија и на Полското здружение на сниматели. На Берлиналето во 2012 година ја доби „Сребрената мечка“ за најголеми остварувања во кинематографијата, а на „Браќа Манаки“ во 2013 година се закити со „Бронзената камера“ за филмот „Кукла“.

И двете работилници се случуваат во Музејот на современата уметност во Скопје. Бесплатни се и отворени за филмаџии во ограничен број. Англискиот е работен јазик, а модераторка Петра Селишкар.

3.Работилница за Мокар Колодиумски Процес

Од чист мерак и фасцинација годинава им се навраќаме на старите фототехнологии. „Мократа плоча“ е фотографски процес од 19 век. Добиената фотографија е резултат на повеќе чекори кои мора да бидат изведени во рекордно време. Алуминиумската плоча се премачкува со колодиумска емулзија и потоа се сензибилизира во сребрен нитрат. Во темна кутија, со минималнo црвено или жолто светло, плочата повторно се вметнува во филмот на камерата. Фотографијата мора да биде направена веднаш, додека плочата е сè уште водена. Потоа плочата се враќа во темната кутија и се развива. Сликата се појавува обратно и секогаш има убави несовршености кои прават да изгледа како да е од дамнешни времиња, иако е направена денес.

Четиридневната работилница се одржува од 18 до 21 август во шармантниот простор на Куршумли ан. Предавачи на работилницата се фотографот Сашо Н. Алушевски и Предраг Ужелац, самостоен фотографски соработник и асистент на Академијата за уметности во Нови Сад, Србија.