Серџо е бунтовник, хиперактивен и хаотичен. Во себе носи гнев што го тера да се изразува преку груби гестови. Сара и Фиори се две сестри кои, како и многу други девојчиња низ светот, сакаат да бидат женствени и тоа да го изразат преку симболична игра – шминкање, облекување и „разубавување“. Осаменото момче живее во розова лимузина, молчаливо е и оддалечено од каква било социјална интеракција. Овие ликови нè водат во денешниот запуштен албански град: Кучова, т.н. „град на нафтата“, територија врз која владее експлоатација што се одразува и на животниот квалитет на жителите.