Жири за наградата „КОКАРЧЕ“

Дина Покрајац

Дина Покрајац е филмска критичарка и кураторка, која живее во Загреб. Дипломира новинарство и политички науки на Факултетот за политички науки и е докторанд на Одделот за етнологија и културна антропологија на Филозофскиот факултет во Загреб. Работи за „Рестарт“ и е менаџерка на „Докукино КИЦ“ – уникатна кинолокација во регионот, посветена на документарните и хибридните филмови. Таа е уметничка директорка на фестивалот „Субверзив“ и курирала бројни интердисциплинарни проекти што комбинираат филм и критичка теорија. Таа е и селекторка и координаторка на дискурзивната програма за „ЗагребДокс“. Превела и уредувала над 20 книги од областа на политичките науки, филмската теорија и филозофијата. Претседателка е на Хрватското друштво на филмски критичари и главна уредничка на е-публикацијата „Зона филма“. Добитничка е на наградата „Владимир Вуковиќ“ за најдобар нов филмски критичар во 2017 година. Членка е и на Европската филмска академија и на ФИПРЕСЦИ.

Танос Ставропулос

Танос Ставропулос ги завршува додипломските студии по ликовни уметности во 2001 година, а потоа магистрира видеоуметност и филмска режија во 2003 година. Воден од длабокиот интерес за филмот, стигнува до Фестивалот на документарен филм во Солун. Низ годините, станува клучен член на програмските и координативните тимови на Меѓународниот филмски фестивал во Солун (TIFF), Меѓународниот фестивал на документарен филм во Солун (TiDF) и Филмскиот проект „Евија“.

Од 2022 година, Танос ја презеде позицијата менаџер на меѓународниот настан за филмската индустрија „АГОРА“ во рамки на Филмскиот фестивал во Солун.

Неда Миланова

Неда Миланова со години работи во областа на документарната кинематографија како продуцентка во АГИТПРОП и како проектна раководителка во Балканскиот документарен центар.

Била дел од тимовите заслужни за филмовите: Автомобилите со кои влеговме во капитализмот (ДОК Лајпциг, 2022), Не допирај ме (Златна мечка, Берлинале, 2018), Работничката класа оди во пеколот (ТИФФ, 2023). Како проектна раководителка во Балканскиот документарен центар, одговорна е за целокупната координација, развој на мрежата и организација на активностите на Центарот, вклучувајќи ги и неговите три меѓународни програми за професионални документарни режисери.

Од 2020 година, таа е дел од тимот на софискиот фестивал Документал како раководителка на одделот индустрија. Има искуство во архивско истражување за документарни филмови и е еден од основачите на Киноклуб Супер 8.